دروس عين الحياة العلاجية
الحلقة الرابعة والعشرون
******************************
(الشركات التجارية للأدوية)
السلام عليكم ورحمة الله وبركاته
اليوم نرى الكثير من الشركات التجارية تنشر بضاعتها على مواقع التواصل الاجتماعي ومنها الفيسبوك وتويتر واليوتيوب وهذا ممتاز وجميل وحلو ...
وعند دخولنا المتكرر لهذه المواقع نجد الكثير من المواضيع ومن ضمنها مواضيع هذه الشركات المقصودة في درسنا اليوم ومنها :
1_ علاج البواسير وضمان الشفاء وبسعر رخيص ومعها فيديو يتكلم فيه رجل عن نجاح هذا العلاج ..
2_ علاج للتضخيم والتكبير والقوة الجنسية ومعه فيديو يتكلم فيه رجل عن نجاح هذا العلاج ويحلف اليمين ..
3_ علاج القولون وخلال اسبوعين وضمان الشفاء ..
4_ التوصيل مجانا ويوصلك علاجنا للبيت بس تواصل ويانا واحنا بخدمتك ...
***********************
يمكن كلكم شفتوا هذا الكلام وكله منشور خصوصا بالفيسبوك .
طيب ما فكرتوا منين جابوا هاي العلاجات ؟
منين جابوا هذا الضمان للشفاء ؟
هل تأكدتوا من صحة مصدر هاي العلاجات ؟
هل شفتوا يوم من الايام واحد من اقاربكم طاب من علاجاتهم ؟
هل عرضتوا هاي العلاجات على دكتور او مختبر حتى تعرف انت شنو قاعد تأخذ ؟
هل عرفتوا عناوين هاي الشركات ؟
***************
الجواب لكل هذه الاسالة هو (لا)...
يا اخواني ويا أهلي ويا بعد عيني أنتم اكو مستشفيات واكو عيادات خاصة ولو بعضهم وصل الى الفساد العلمي والمادي .
وأكو اطباء اعشاب بعموم العراق ولابأس اكو اعشاب اصلية وهم اكو مريدي ههههه بس انت تأكد ..
المهم عقلك براسك اذا مريض توجه الى الدكتور والى الطب الحديث واذا ما تم الشفاء بعدها روح للأعشاب بس كون أكو واحد ثقة حتى ما تطيح بشباك بعض العشابين الاراذل احذر.
*****************************
حادثة حصلت معي
قبل 3 او 4 سنوات شفت منشور عن علاج البواسير والمنشور مغري بيه علاج مرهم وسعره 25 ألف وضمان الشفاء وخلال اسبوعين يا الله قلت بس هو هذا علاجي تواصلت مع الشركة على الفيسبوك وجابولي العلاج واستعملته وفعلا صار هدوء من الالم فترة اسبوع وبعدها طلبت مرهم ثاني وصار هدوء وليس شفاء وتوقفت عنه بعدها بأيام صار نزيف عندي وقبض والم بالبواسير وتخربطت احوالي ورحت لاحد الاطباء وشخص الحالة (3 بواسير وناسور وفطر ) وحدد عملية وكملتها وطلعت للبيت وخلال 30 يوم انتهى كل شيء وراحت الالام والاوجاع والنزيف والقبض ولله الحمد انتهت الماسات...
الشاهد ان المرهم ضرني ما فادني وخصوصا لمن تواصلت مع صاحب البيج وسالته عدة اسالة منها منين مصدر العلاج قال المانيا شوف شوف الدجل ...
على فكرة لقيت نفس المرهم عند احد العشابين بسعر خمسة الاف دينار اي والله نفسه هو بالضبط .. بعدها طلع الاخ يشتري من العشابين ويغلف ويرتب ويبيع على انه الماني ومجرب يبعد عيني ..
شنو الضمان للشفاء ... قال مجرب بالمانيا ....
ليش سعره رخيص ...... قال لان جملة ....
وبالأخير تم الاكتشاف ان هذه الشركات هي عبارة عن مسرحيات حالها حال هواي من المسرحيات اللي يضحكون بيها على الشعب العراقي المسكين ....
تقدرون تجربون وتشوفون كلامي هذا صحيح او لا ...
اخذوا اي علاج منهم واعرضوه على دكتور جيد خارج العراق وشوفوا الكلام اللي يجيكم الكلام العلمي طبعا وقتها راح تقتنعون بان هاي العلاجات مضرة وغير نافعة .....
_______________________________
ممكن ان منشوري هذا يضرني ولكن غير مهم والمهم هو التنبيه للكل لان من مسؤوليتي ومسؤولية كل معالج ان ينبه الناس عن هؤلاء وينصح الناس على الطريق الصحيح للتشخيص والعلاج ..
ومن لديه اي سؤال ممكن أن يكتب على العام في الردود فقط لأنه لا مجال على الخاص لأني رجل تعبان صحيا ولا استطيع الرد على الجميع في الخاص فأرجو المعذرة....
والسلام عليكم ورحمة الله وبركاته